Sudan waxaa kale oo ay amar ku siisay Danjiraheedii u fadhiyay Nairobi in uu dhakhsa ugu soo laabto Sudan.
Maxkamad ku taalla Nairobi ayaa shalay amartay in la soo xiro Madaxweynaha Sudan, Omar al Bashir, haddii uu Kenya tago, maaddaama ay sidaa dooneeyso Maxkamadda caalamiga ah ee dembiyada ICC.
Madaxweynaha Sudan in la qabto waxaa dooneysa Maxkamadda caalamiga ah ee dembiyada, ICC, oo ku eedeyneysa in uu gobolka Darfur ka geystay xasuuq iyo dembiyo dagaal oo kale.
Kenya waxay hore u saxiixday heshiiska lagu dhisay Maxkamadda dembiyada dagaalka.
Dowladda Kenya waxay sheegtay in ay weydiisaneyso in dacwaddaas mAxkamadda dib loo qaado.
Sarkaal sare oo ka tirsan dowladda Kenya ayaa la sheegay in uu ku tilmaamay in go'aanka maxkamaddu aanuu la jaan qaadi karin xiriirka ay Kenya la leedahay Sudan.
Labada dal ee Sudan iyo Kenya waxay ka wada tirsan yihiin urur goboleedka IGAD iyo ururka Midowga Afrika.
